ZOGAM THUTHANG

• Zomi Nam Ni in World Zomi Congress in Pu Cin Sian Thang pen $5000 tawi ‘Zomi Independence Hero Award’ pahtawina pia a, kilungdampih ciat mahmah hi.
• Zomi Nam Ni in Tedim khuapiah Feb. 20 ni pen Chin Sate Day sangin Zomi/Chin National Day cih ding deih zawkna hang leh ZRO sticker belh kawikawina hang tawh palik ten a makaite mi 5 a mat pen lungkim loin mipi 300 val in palikleen umcih in, “na mat teng uh zan nai 9 ma-in nong khahkhiat kei uh leh palikleen teng hal ding hi ung” a cih uh ciang Chin state SPDC Chairman ahi Hung Ngai ii thupiakna tawh kikhahkhia takpi cih thu kingah hi.
• Leitung pianzawh a khatveina-in Chin Pyine in aituam kumpi nei ta hi. Kumpi-a kihel mite pen MLA kici a, mi 24 pha uh hi. Tua lak pan Hung Ngai [Mitdat] in Chief Minister, Hau Khen Kham [Tonzang] in Speaker, OhnLwin [Matupi] in Dy. Speaker sem ding uh hi. Minister sem ding mi 9 zong kiseh khin ta a, tuate pen CinLianpau-Tonzang, NangZaPum-Tedim, RamMang-Hakha, NingNaig-Mindat, KeeThang-Kanpalet, KyawNyein-Paletwa, Col.ZawMinOo-Galkap, Dr.BaMaung-Kanpelet, VanThawng.
• Mizogam, Champhai-a om Tg. John Lianpu bawl Takkheh Pasal! cih VCD/DVD ahZogam itna, Khuado, Zomi Nam Ni leh Mopawi la hoih nono tampi kihel a, a sawt loin kingah thei ding cih kiza in, kingaklah ciat mahmah hi.
• Kawlgam leh India sumbawlkhopna pen tun a vetpi in USD million 1000 val pha ta a, tua sung pan gamgi sumbawlna pen USD million 140 pha hi. Sepkhopna a tangzai theihna dingin India United Bank leh adang thumte tawh direct-a kizop theihna ding koih banah Tamu–Kalaywa-Kalay leh Rih-Tedim-Kalay lampite puahkik ding geelna kibawl hi.
• Feb. 18 ni nai 8:30am in Cikha pan Tedim lam zuan, Falam lambupa’ motor, AE pen Tonzang gam Singgial zangah a hat hawl luatna hangin kibungh a, ahawlpa khut kitan cihloh a tuangte bang lua ci lo uh hi. motor bel a mailam kisia gawp hi. Haimual lamah zong tuteng motor kibungh tam cih Tedim khangnote tung pan kiza hi. A hang bel lampi hoih in kihat hawl thei lua hi tek pian hi.
• Zogam Tonzang uk sung, Keltal khua-a teng Pa Thang Khan Khup leh Cing Kap Lunte nupa 8Dec2010 ni-a lokuan pen tu dong ciah kik nai lo uh a, a omna a thei zo kuamah omlo hi. Amau ta numei 3 leh pasal 1 nei uh a, naupangno cikcik hi lai uh hi. Tedim uk sung Suangzang Youth Fellowship panlakna tawh a tate huhna ding USA pan Ks.100000 kipia cih thu kiza hi.
• Ong tung ding Feb. 27 ni nai 1:40pm ciangin Zomi Christian Fellowship, New Delhi in Free Church, Parliament Street-ah kum 29 sung a makaih Topa tungah Lungdam kohna pawi kibawl ding a, la sa siam tampite lasakna a om ding banah Rocker Kappi zong kisam a, a pai kha lote hamsia mahmah ding cih thu kiza hi.
• Zomi Siamsin, Kalay University in 26.2.2011 [Sat] ni ciangin Nawarat taih, Bogyoke ah maithak muakna nasia tak nei ding cih thu kiza hi.

KAWLGAM THUTHANG

• Aung San Suh Kyi in sumbawlna lama leitung in Kawlgam a khalcip pen mipi in thuak sa lua ta ahih manin kiphelkhia leh a ut thu tulai a tangkoko pen USA in awlmawhin thukan ding palai-in LARRY DINGER pen Kawlgamah sawl cih thu kiza hi.
• A beisa 17 Dec. 2010 in Kawl kumpite in Kawlgammi deidan om vet lo, pasal kum 18-45 kikal leh Numei 18-35 kikaal teng kum 2/3 sung galkap tumsak hamtang ding cih thukhun taangko khia uh a, galkap tumsa peuhmah pensen/inn ciah pak ding nangawn phal nawn loin mancip ta uh ahih manin kipatau sim ciat a, Pegu khua leh mun tuamtuam ah langpanna lai kisuang kawikawi cih thu kiza hi.
• South-East Asia ii media lamah a minthang khat ahi, Myanmar Times a patkhiatpihpa Ross Dunkley pen a omna khan sungah numei khat in kaanza koihin palikte mansak a, visa bei ta cih thu nihte hangin galkap ulian ten man uh hi. A hang taktak bel galkap uliante tawh a kilemlohnate hang hizaw cih thu kingah hi.

LEITUNG THUTHANG

• Japan gamah 2010 kum sungin mi 100,1000 suak na pi’n 11,94,000 si mawk uh a, a suak sangin a si tamzaw ahih manin leitung bup in lamdang sa ciat cih thu kiza ngah hi.
• 2011 Jan. 27 nia kipan Japan gam Kagoshima prefecture leh Miyazaki prefecture kikala Kirishima meimual puakkham pen thahat lua ahih manin suangtum lianpipi nangawn a lenkhiat ziahziah banah a khute meilom bangin vanah 5000[feet] val bang lengto a, a kima annteh kicingte vuknelh gawp in, kum 52 sung hihbang om ngei lo ahih manin lamdang kisa vat mahmah cih thu kingah hi.
• Isreal gam in galte thaupite[missile] lehkap kik theih pahna ding Arrow-II cih thaupite bawl uh a, hihte pen Iran ten Ballistic Missile tawh ong kap leh athuh kik pahna ding gelna hi in, Defense Forces-a Deputy Chief of Staff, Mr. Yair Naveh in hihte sangin ih muanzawk Pasian hi, ci-in mipi tungah gen hi.
• Ong tung ding March 3, 2011 ni ciangin Thailand leh Cambodia gamnihte gamgi vaia nase taka abuainate uh UN ten a kuppih ding banah Kawlgam leh Bangladesh gam zong gamgi vai siang thei nai loin kingeu etet lai uh cih thu kingah hi.

LOCAL NEWS – CINGTOMKIM

• Tuma kha 2 lai panin Delhi Metro-te tuandan kikhek hi. A mailam khen (coach) nih pen numeite tuanna hi ta a, tua losiah a nunglam coach teng pasal tuanna hi ta hi. Numei tuanna, pasal tuanna na pilvang kei leh ni sialin mi tampi tuahkhak khatvei khialh man Rs-250 liau kha thei ding na hih manin kidophuai hi.
• UNHCR zum leh a kisaipih zumte ah na pai ciangin a kisai kha lo laidalte na puak khak loh nang pilvang in.
• ZCF Vikaspuri ii biakinn zong WZ-49A, Bodella, Vikaspuri ah kisuan ta a, a kikhawm kha ten nuam zaw tham, kici ciat ven… va siim dih ni e guai???
• 2011 kum Delhi Zomi Refugee sung ong makaih ding makaai kiteel thakte a nuaia dan hi –

President- Tg.Khoituang

Vice- Tg. Paumuan

Secretary- Pa JPau

Asst. Secy- Tg. Khaibawi

Sumkem- Pa Khoipau

Saziansit- Tg. Liantawng

Members- 1) Mangpi 2) Pa Nang Ngaih Lian  3) Sia Cicin 4) Sia David Khaipi

Vaphual.net.