'Koi mah ah ki zang thei lo,thupi lo mi' ih cihte pen ih heh lai tak ih cih khak bek hi. Hih mun, hih thu, hih vai ah asep theih kei hang a dang mun, thu leh vai khat teitei ah a mah in na thupi pen thei ding hi. A haksatna ah - ei tawh akituak pilna, ciimna ih neih lam a kithei mi ih tawm mahmah hi. Thei kha leng lah ei'pilna, ciimna te ei leh ei 'n ih neu muh kha aa tawm bek ih zang ciat hi.
Ih neih sa pilna,ciimnate hoih tak a zang thei mite in amau' nuntakna sung ah gualzawhna angah uh hi. Gentehna in-a neu tung pek in mitmulo, khua za lo ahi 'Hellen Keller' pen a tawpna ciangin leitung ah aminthang lai at siama hong piang hi. Cihnopna ah ih piang pih pilna, siamnate hoih takzang thei leng bangzahta haksa mah ta seleh a tawpna ciang ihgualzo ding hi.
Ei pilna, ciimna pen ei aa bek a hihi. Midangte pilna, ciimna tawh vateh sekei in. Nateh aa leh zong na' pilna a khangtona ding bek hi sak in. Midang te eng in va dem ding hi lo hi.
Mipawl khat te in mi'gual zawh nate mu in va eng hi. Eng bek tham lo haza lai uh hi.
Pawl khat te ciang min' nuamsa leh a hazat man in gensia aa a nuamsakna uh va susia uh hi. A mah ih eng leh a mah bangin ih pil, ihsiam, ih hauh na'ng hanciam ding pen ih mang ngilh kha hi.
Nauluai sung pan hankhuk sung ih tung madong ih nuntak na ah mi khat ciat in lampi khat ta ih nei hi. Ei' lampi pen ei' bek tawnh ding hi. Tua mah bang in ei'te pilna, ciimna pen midangte tawh ki bang lo thei ding hi.Tua thu ih mang ngilh loh thupi hi.
Genteh na in-NU leh PA pawlkhat te in a tate uh siavuan(Doctor) piang saknuam hi.Tan sawm laivuan na ah mat (mark) tam ngah nang hanciam pih in siavuan pilna sinsak hi. A hih hang tate in siavuan lamah ukna lah neilo, pilna lah baang zolo a hih man in siavuan apiang hangin za tui sut naphim leh stethoscope bek tawi in M.B.Bs bek tawh a nuntak na uh bei sak hi.
Ei' ukna, lunggulhna lam bek mah ah hanciam leng a lam dang gualzawh na leh khangtoh na ih ngah hi. Doctor, Engineer te bek in gualzo in a nuam sa hi lo hi.Leitung ah a dang nasep ding tampi om lai hi. Tuate ah zong hanciam leng gualzawh leh pilna tampi ih ngah thei hi.
Pilna, ciimna, khangtoh nading laihoih, lai manphate ih sim ding zong kisam hi. Tua te pan pilna ihzong ding hi. Ih nuntak sung pilna ih zong kul hi. Sang pan a sang pen lai tan ih ong hangin 'Pilna nei ta ing' ki ci zo lo hi. Pilna neih nang lampi a mupan bek hi hang.
Laisimna pen ih khuakleh ih lungsim an a vak tawh kisun hi. Lai ih sim na hangin ih khuakah a ciamteh huai pilna tuamtuam ih ngah hi.Ih lungsim ah ciamteh huai te ih ngah khit ciangin migitna, lungneemnate hong khang semsem ding hi. Pilna hong khang toh ciang in ih muh na zong hong khang semsem ding hi. Kipilsakna, kiphasaknate hong mang ding hi. Maitaina in ih lungsim hong vak sak hi. Lungsim vak in lung nop leh gilona, huaihamnate hong tawm semsem ding hi.
Tua bek tham lo lungsim vak leh ih ngaihsutna zong hong vakin hong manlang ding hi. Mite muh loh ih muh theihna pilna khuavak hangin a hoih ,a manpha makaih zawh na ih nei ding hi.
Tua hi aa lung sim leh pumpi khangtohna ih ngah ciangin leitung ah mihing ih suak khakna' a manphatna ih tel zo pan ding hi.Tua ih hamphatna tawh ih gam, ih lei, ih tui, ih minam aa ding na sem leng bang zah in ih manpha zaw lai ding hiam!
Bibiana(MLT)
2nd year
University of Medical Technology.
Source by - siamsin.org
No comments:
Post a Comment