Wednesday 9 February 2011

ZOMITE' KHANTOHNA DING

Ei Zomi (Chin)  kici nidanglai Khamtungmite pen mitkeuh nuamta a, khangnote in thudotna nei tawntung uh hi. Zomite khantoh nadingin bang kisam hiam? cih ahi hi. Nakhempeuh bangtawh pan ding cih zontawm ding ahihmanin dawnhak mahmah hi. Tua dawnna ding, kicinglo thamlo-in a mongkhat zong sawkkha lo ding ahi zongin, keima lungsim hong susu ngaihsutna tawm kong piakhia nuam hi.
Patriotic: Nam-itna Lungsim:  Gam leh Minam khantohna khaici hoihpen, Nam-itna ahi hi. Nam-itna lungsim omlo-in minam kipuah nuamlo thamlo-in kipuah theilo ding hi. Minampuan silna bektawh minam-itna kicinglo ding hi. Nam kibangte tenpih ciang bek tawh kicinglo hi. Namdang tenpih zong minam langpang hituanlo hi. Nam-it nasep mapan dan kibangkim theilo hi. Pawlkhat in thautawi nuam ding hi. Pawlkhat in political party tawh kalsuan nuam ding hi. Pawlkhat in biakna kipawlna tawh nam-itna sep sawm ding hi. Nam-it ngentang ahi uh hi. Hih kipawlna sungaa kihello nam-it mitammahmah hi.
Nam-lungsim[Racism] leh Nam-itna[Patriot] pen kido tawntung hi. Nam-lungsim neite in power zangin thanem zawte nuainen[nengniam] hi. Nam-itte in tua nuainenna pan suahtakna a ngah nadingin dalin do uh hi. US gamah avom leh akaang minam kitelkhialhna ol mahmah hi. Racial Discrimination a tawmna dingin United Nations in Human Rights thukhun  [Articles-30] bawl uh hi. Hih thukhunte in, minam deidan omlo-in mimal khempeuh a kibangin Right ngah theihna ding leh bitna[security] a neih nading ahi hi. Nam-itna Lungsim (Patriotic]  bang hiam?,  Nam-lungsim [Racism] bang hiam, ci-in khentel theih ding kisam hi. Minam it aa kinei-in namdang khempeuh galmuh ding zong hilo hi. Minam khualnate Nam-lungsim ih sak ding zong lauhuai hi.
[Racism] Nam-lungsim. Majority kici population tamzawte in minority kici population tawmzawte tungah power zangin ukcip nuam uh hi. Mel leh sa kibanglo, pau kibanglo, ngeina leh biakna kibanglo, pilna a saang a niam, a zawng a hau sungaa a piang tawntung buaina ahi hi. Human Right tawphah-a kibawl Constitution tawh ki-ukna gamte-ah phadawm zawdeuh hi.  Nidangin Europe gam leh nitumnalam gamte-ah avom-akaang kideidanna nasia hi.
Mikaang khat in mivom spouse aneih leh khang-7 dongin mivomin kiciamnteh hi. Kiciamteh cih ciangin, a Right kibanglo hipah hi. Pilna-Saa'ng, Biakinn dailenna-buuk, club tuamtuam, vanleeng, tembaw, meileeng, tuanna akaang leh avom kidei hi. Signboard tungah " WHITE ONLY" ci-in a kisuan ciangin nam dang khempeuh lut theilo hi.  Tudongmahin [Human Right] tampi kipia hinap-in, taangtawng-a kipan a tawphah nencipna hangin galkap officer 200 sungah color khatbang  bek kihelzo pan hi. Color neite a khanzah dingin khangkhia zolo uh hi.

 WW II ma-in a kaangte simloh vanleeng kihawlsak lo hi. Outstanding lua mahmah ahihkei ngaalleh a kaang simloh zaa kipialo hi. Employment lamsangah  position kibang napi payment rate kibanglo hi. Benefit tuamtuam ngahdan kikim lo hi. Zumsung, khualzinna facility kibanglo hi.  Me nangawn pia theilo uh hi. A
 kaangte ciangin misisate vote nangawn lalai mawk uh hi. Nam-lungsim neite in namdangte nuainenin bawlsia hi.
Kawlgam dinmun:   Ei Kawlgam minam buaina [Racial Discrimination] pen tuhun asiapen laitak ahi hi. Tribal minority te nencip nopna hangin Constitutions omlo-in Marshall Law tawh thongkia uk bangin kum100 dektak hong ki-uk hi. Kawl minam bek khansuah nuamin Strategy lian mahmah nei uh hi. Budhism pen gambup biakna hiding ci hi. Tua laigualkhat hangin Budhist lo khempeuh sihna dumsung hong tun ahi hi.  Budhist aading ciangtan omlo-in lampi honsa-in kikoih hi.
Christian biakinn lam nang leitang letmat khat zong hong pialo hi. Biakinn-lui  puah ding leh behlap ding phallo hi.  Singlamteh kitung khempeuh satpai hi. Budhist lokhempeuh in, teeltheihna [freedom of choice] lamkhat zong ngah lo hi. Pilnalam kisum hi. Business kisum hi. Political lamah kisum hi. Luphong lo dingin hong gawicip ahi hi. Palik-Galkap Budhist  hilo khempeuh santhum(Sgt) tungkan piakloh dingin thukhung uh hi. Gammite sangin gamdang Sente [Chinese] in Right nei zaw uh hi.
Freedom of ownership hong pialo hi. Mipi neihsa, inn, lo, motor, ganhing, mihing i zi-itate dongin adeih bang muhgegu-in zang uh hi. Project khatpeuh paulamin, mipi tenna inntul innza kikhinsak hi. Kachin gam, Kale airport expand nading  inn lehlo kip tampi hawl khia uh hi. Relocation geelna nei tuanlo hi. Natural disaster huihpi-pingpeii, ziinliingpite, tuipi hual cyclone suksiat zahmahin sehuai hi.
Kawlmi khat aadingin nakhempeuh kihong hi. Tribal minority minam aading khatzong kihong lo hi. Tribal thuakzah a thuak khalo, Kawl-mipite nangawn in haksa sa uh hi.  [Force Labour] Thaman pialo-in mipite amau anguai tawh naseem sak hi. Amau neek ding zonhun omlo ahihmanin mipi kiallua-in pulnatna tawh sisi uh hi.
[Racism=Nam-lungsim tawh ki-ukna hang thupiangte]
Patriotic: Nam-itna Tawh Kisai:   Patriotic Nam-itna neite in nuainenna pan suahtak nadingin Independent ngenin kidona piang tawntung hi.  Liberation Movement tuamtuam hong om hi. American in sisan tampi luangin British Colony khut sung panin 1776 kumin suahtakna la uh hi. Abraham Lincoln in sila suahtakna pia napi khindai zolo hi. 1960 pawlin avom leh akaang Equal Right ngenin nuntakna tampi mah in manthan lawh hi.  Mivom makaipa Martin Luther King kikaplum hi. Biaknalam zong Patriotic om veve hi.
Martin Luther in khate suahtakna dingin [Upna Thesis 90] Biakinnpi mai-ah suang hi. Minam itte in amau gam ciat panin puahphatna(Reformation) bawlin nakpi-in taangko uh hi. Mi tultul thenthen in sihlawh hi. Rome galkapte leh Calvanism pawlte bang thau mahtawh a kikap tangtang uh ahi hi. Tua lo-in mipi numei naupang deih bangin banthah mawk uh ahihmanin thatang mahtawh dalhun om zel hi.
Ei Kawl kumpi zong Racial Discrimination pressure khaulua a, kithuak zolo ahihmanin, Patriotic Movement hong khang ziazua hi.  Federal State ngenin thautawi gamnuaimi{Underground Movement}  tampi kipan uh hi. KNU, KNLA, SSA, KNPP, NDAA, UWSA, ABSDF,CNF, ZORA, ects gamnuai tapung a dimin om hi. Hih khempeuh pen Patriotic Movement ahi hi. Nam-itna pen sisan kiat dongin piak kul thei hi.

Political party tuamtuam panin, UN leh Asian Pacts khawngah huhna ngenin lungphona [Demonstration] nei uh hi. Aung San SuKyi leh NLD makai khempeuh, ZNC makai U Cin Sian Thang leh party leader khempeuh thong sung denna hi. Amaute deih bulpi pen launa omlo-a lungmuangtak a om theihna ahi hi. Human Right ngen ahi hi. " Human Rights means the right of all people, to live in peace,without fear."  [Hih a tung-a khempeuh pen Nam-lungsim neite leh Nam-itte kibatlohnate lahna ahi hi.]

PTHAU TAWILO, POLITICAL ARTY LUTLO, NAM-ITTE NASEP.

Political party sung kihello, biakna TUAMTUAM leh kipawlna tawh kisawhpawilo, khua leh tui, gam leh minam naseem nuam tam mahmah hi. USA katun ciangin US citizen suah nang kahan ciam hi. Gammi hoih kasuak nuam hi. Political party tuamtuam tawh kizop ka ut kei hi. Kapawlpi-ah kikhawmin, politic party tawh kigamla theithei-in ka-om hi. Ahih hangin gam leh minam aadingin septheih tampi om hi. Khantohna manlaang thei dingin kiseem thei hi. Mikhatpeuh ankuangzonna Raw-material kasuahloh nang ka kikeem hi.
 
1. Communication;  Kikawmna leh kisukkhakna. Leilam kikawmna. Mihing leh ganhingte pen kisukkhana , tungtawnin kingaihna kilamnaihna piang
 hi. Muh ngei khat leh muh ngeihloh mikhat tawh kituak leng kiho dan kidang hi. Maitai dan kidang hi. Ki-itna leh kipumkhatna a olzawk nangin bual khawm, seemkhawm omkhawm , ding kisam hi. Ei Zomite hong kikaksak hong dongkholh mahmah pen,Communication kikawmna tawm lua hi. Leilam zui a kikawmna motor, meileeng, setbing, sakolleeng, bawngleeng, zattheih dingin, lamlian bawl kul hi.
Vanlam huihlak zang a kikawmna ahi Tele-communication,  TV, Radio tawh kikawmna kisam hi. Tulaitakin Sia Vum Za Nang leh galkap kumpite kithuah a, motor lam a hanciam laitak uh ahi hi. Amau hanciamnate i theihpih khit loh hangin, lampi hoih pen a kisam mahmah khat ahi hi. S.Chin State pen Budhist ahihmanin puah cihtakin kumpi in puahsak hi. Ei N.Chin State pen mitkeuhin hong khemzawh ngaplo uh ahihmanin huh ding cih genloh, eitha tawh ding nangawn kingenlai mawk hi.
Ahi zongin ei khua ei tui puah ding pen thasial ding hilo hi. Galkap power zangaa mipitha suk ding zong hilo hi. Nasep-hun leh lamtawh hun gelsiam kul hi. Gampua leh kumpi lampan huhna  Fund a omleh zong mipi noptuam nangmahin zek huai hi. Galkapte pen mipi ngah dingteng ne -in mipi a sih donga zanghte ahi uh hi. Lampi kikawmna pen pumpi mahmah kizopna leh kikholhkhopna thahaat manlaangsak hi.

Huihlak kikawmna:  Internet leh Phone kiho-in zinei-pasalnei tampi om hi. Cikmah aa kithei hilo hi. Huihlak kizopna pen TV,Phone, Radio, Computer cihte ahi hi. Tua khempeuh nuamtakin i zat theih nadingin Electric power kisam hi. Kapteel khua-ah Hydro Electric kadeihsak manin Teng-70 kapia hi. Tua tawh bangmah kiseemzo lo ahihmanin Dr Suan Za Dong in maban nong nazopsak hi. Motor lam khawng kadeih hangin kei pen teeklam leh thakiamlam manawhta kahihmanin kahuhzo nawn kei hi. Tua kacih ciangin kong kisialhna hilo hi. Khamtungah mei kisamlua cih kakin ziate hong lak kahi hi. Electric power ngah nadingin lampi tuamtuam om hi.
Huihpanin  Wind-power tawh ngahna pen vanlianin ei zat zawh ding hilo hi. Hidro Electric pen ei kiangah tuitha kicing ding hamsa hi. Meitei gunpi daltan zo ding ihih kei ngal leh ollo hi. Khamtungah tuitha zat theih ding tawm mahmah hi. Tuihoihna khempeuhah hanciam huai hi. Ahi zongin  Solar Backup Generator zangin mei kingah thei hi. A diakin ei Zogam aading hoih penpen hi. Inn simah neihzawh nang hanciam huai hi. Ei mah bang leitung gamneu khangto cil ten nakzat mahmah uh hi. China, India, Afghanistan, Nepal cihte pan kinak bawl mahmah hi.
Nitaang pan aa kila ahihmanin ei aading lampi hoihpen hiding hi. Electric power hoihtak ngah hileng, TV, Radio, Computer, Phone deih bangin kizang ding hi. Living Standard thakhatin hong domkang' ding hi. Khantohna pen manlang mahmah ding hi. Mit hong vak ding hi. Business nasepna tuamtuam hong tangzai ding hi. Sangnaupang leh pilnalam computer system tawh na kiseem thei ding-a, leitung bup zakimin pilna kingahzo ding hi.
2. Economic lamtawh kizopna:  Marketing Center Leitung mihing kihuzaapna hoihpen sumbawl-sumzuakna panin khangto mahmah hi. Kikawmna hoihlohna hangin a kiseem theilo tampi om hi. Shopping Center-Bazaar nangawn Tedim khuapi cikankanin kimualsuah zolo hi. Hihmunah, Zomi khantohna hong khaktan thanemna om kha ding hi. Ukna aana zatzia leh cihtakna kitaangsam hithei ding hi. Makaite in a nasep nungzuihlo hiding hi. Shopping Center-Bazaar om manin kisukkhakna tam a, kamtawh kigen theilo khuamuhna piangsak hi. Business thahaatna munah mite teitanga civilization manlang pah hi.
Tedim-milo khempeuh omna-ah Bazaar neizo ciat hi. Eisangin manlangin hong teitang zaw hi. Bazaar i picinloh pen namdangte batlahna namkhat ahi hi. Shopping Center-Bazaar khua kimah om leh, taangsapna khat a om ciangin, tuamun direct kidelh pah hi. Thatang gimna phatuam hi. Hunbei phatuam hi. Hun in sum hi, ci-in Europe minamte paunak om hi. Aaktui tangkhat leinop manin innsim bansik kullo hi.  Mun tuamtuam pan-a hong pai minam kim om a, pilna namkim om a ,  thuthak theihna manlaang hi. Koimun ah bang thu piang hiam? Koimunah bang van kingah hiam? Kuate in bang naseem? cih ahi zongin, news lamdang tuamtuam zakna manlang hi.
Khamtungaa piang anteh them icihte pen, hong thupi mahmah ding hi. Lonamsia(mint) pen leitungbup in , namsia salo-in namtuisa uh hi. Kideih mahmah hi. Zogam tui omna khempeuhah ciin lohin hoih mahmah hi. Hoihtak ciing leng,tua bek zong, summuhna hoih suakzo hi. Kale, Kalewa,khua khempeuh kipuak thei hi. Adawn kung-4 kihen lel pen US gamah $1.99-$2.19 bangin zuak uh hi. Marketing Center or Shopping Center kician omden leh anteh them zuakte nangawn sumbuukpi a suak dongin khang thei hi.
Sumzian hoihpen eima hanciamna leh kuhkalna ahi hi. Nidangaa moh-hinn-kha a zuak numei khat pen Bazaar pi sungah puanzuakin kidawk dekdekin pheitut zeizai kamu ngei hi. Sum pen a luanna munah kimu hi. Shopping Center tawh a kinawk den khat in lampi khat teitei mu hi. Chanthagyi khua sanggamte khat zatui palen tawm tawh, kawlkaiteh tawh Letpanchaung bazaar paitawntung hi. Tu-in taih-khann khat sungah tu ziuziau hi.  Lom-omna khempeuhah zaitakin kiseem thei a, khantohna hong tawsawn zo hi.
3. Social Life Inter-married :  Pupate hunin zehtan tam mahmah hi. Kaunei kihta uh hi. Beh leh bawng tawh kidei uh hi. Khua khat leh khua khat kidei uh hi. Mualkhup kingenin buai thei hi. Pau kibanglo nam kidei uh hi. Tudong mahin gimnam tawlnga lo hi. Hih haksaatnate pen kikawmna omlo hangaa piang buaina ahi hi. Ei ciangciang pen Inter-married min puaktak lo hi. Namdang tawh teng hilo-in unau teeng ciang kihi lel hi. Tulai khangthakte pen a geinai aa nawkkhak peuh tawh lungkim pah lel uh hi. Kinawkna tawmlua ahihmanin kidang muh pongmawk ihi hi. Namdang tawh teng cih lipkhapna zong leitungbup level batlahna namkhat ahi hi.
Mizo gamah Kala tawh teng tam mahmah hi. Mizo pau pau u-a kuaman Kala-in mutuanlo hi. Kawl tawh iten ciangin manthanpih lo-in eikam einam itsak zo peuh leng hipah lel hi.  Ka-u numei Lusei galkap khat tawh hong kiteng hi. Eipau mah zang melmel hi. Eimi lakah tualbial hi. Kanu-kapa in pakta mahmah hi. Innkuanpihin Lusei kaneihman un, Mizo pen lamdang etna omnawn lo pah hi. Ka tanu in Karen pasal khat hong nei hi. Nu aw, Pa aw hongci hi. Eimi mahtawh kikhawl hi. Ama hangin Karenmi dangetna kanei nawn kei uh hi. India Prime Minister Ragit Ghandi in mikang zi nei hi. India minamte aadingin nakpi-in naseem hi. Minam khat leh khat kidalna kawmpi i sukpai zawh mateng khantohna zekai ding hi. Kideidanna leh ki-elna tawh khangtawntung hunbei ding hi.
Zoleitang, S.Chin State pan N.Chin State dongin minamdangin kituat loding hi hang. Kidalna wall kawm khunglo ding hihang . Ih tate hong kiten leh ki-itna khangsakin mualkhup  tawh gawtlo ding hihang. Japan minam pen nidangin neu mahmah uh hi. Minam dang khaici la-in Intermarried nakpi bawl hi. Pumpi gol bek lo-in khuak thahaat hi. Pilna khang hi. Siamna khang hi. Minam dang tawh kiten pen manthanna hikhin lo hi. Tuhun Kawl kumpi inzong Kawlte pen meelsia kisa u, a ci vomin milak phulzo kisalo hi. Kumpi in, (Chinese) Sen minam ut bangaa hong lutsak pen minam meelhoih nang leh pilna leitung dang abat nading ngimna nei hikha ding hi.
Kawlgam ah kahbia teng hoih a, zong pilin  midang sangin hauzaw pah uh hi. Kei utthu bang hileh mikaangte  Zogamah tampi zi leh ta-in ciahpi zoleng ka-ut mahmah hi. Mikang te Zopau bektawh hong pau leh Zomi hilel ding hi. Tuhunin haksatna hangin minam alom atangin a lut hangin, nidang hunhoihlai-in US kumpi in, pilna nei, siamna nei vakna-nei mite bek lutsak hi. Ih tanute in mipil aneihleh ih gam hong ciahpih hen. Pasalte in minamdang mipil zi aneih leh ih gam hong ciahpih hen. Tua hileh mipilgam-mi melhoih gam kisuak ding hi.
4. Leadership Kiteelna:  Khuasungmite ahauh ciangin, khuabup khangto kici a, khua khempeuh hau-in akhatoh ciangin gam khangto kici hi. Gam leh minam puahtheihna power a nei taktak pen khua-hausa leh upate ahi uh hi. Mipite kamkaih a len a keem pen Hausa leh Veeng-upate hipi pen zaw hi. Khua khantohna pen hausa-upa makaih-siamna tungtawnin khangto ahi hi. Khua khempeuhah galmuanna a om ciangin gambuppi galmuang zopan hi. Khua siangtho cidam nang a keem pen hausa ahi hi. Numei naupang pilnalam a tawsawn pen hausa ahi hi.
Gambupi hoihna leh khantohna pen khuaneu pen pan kipanin a golpen dong ahoih ciangin gambuppi khangto ahi hi. Gam leh minam a makai taktak pen Hausa leh Veeng-upa ahi hi. Hausa nateel ciangin; Beh leh nam sihsanin teel kei in. Pawlpi khat leh khat kidemin teel kei un. Khua leh tui aading kipumpiak deihsakna liante en masa un.  Pasian zahtak biaknami teel huai hi. Zomite mit hong honsak Zeisu ahi hi. Tuhun leitung dangtawh kikim kalsuan hun ahih ciangin mihoih ahih nakleh laisiam degree nei, mipi haksatna mu a, a tunglam phulzo mipil teel un. Sumbawl cimawhte teel kei un. Zuhai-zuduh teel kei in. Zunete in a hun tamzaw zuneekna-in beisak hi. Golhsum ne thei hi. Zualzangin  numei tungah paktat thei hi. Tua bang mite in, mipi nautang hoihna dingin na tampi semzo lo uh hi.
Tuhun khangno thahaatlai a tamzaw gampua ah sum zong uh hi. Hausa makaite muang le-u khua leh tui aadingin pia nuam mahmah uh hi. Abeisa hunte-ah kipawlna sum, or taangsum kizatnate pen amu-amal kilanglo tamzaw hi. Tua ahih ciangin kipawlna khat peuh pen kuaman support ngamlo uh hi. Makai kisam ahi hi.Minam-it gampuahnuam khempeuh in, khuakimah Hausa kician, mipil-misiam, Pasian zahta biakna-mi, khanglai thahaat, khua leh tui a it teel ciat ni.
 5. Cultural Movement:   Minam icihpen ciaptehna omciat hi. Tua ciamtehna sungah kizem kizepna pen Zo-Ngeina kici nuam diak se hi. Tua tawh kizui-in Zo-Ngeina pen zolaam leh zolaa cihtawh hong kizuito pah hi. Christian kipatcil sangin muhna zaizaw ta hi. Ngeina leh Biakna kithei  siam mahmah ta hi. Biakinn konghonna, Kikhopi honna, political party nasepna bek hilo-in biakna makaihna tuamtuamte in, Zo-laa leh Zo-laam tawh kihong kimu mun mahmah hi. Tua pen minam bup mit kihonna namkhat hi a, lungdam huai mahmah hi. Zo-Ngeina leh Zo-laam,Zo-laa tawh Pasian min kiphat thei cihthu kiphawk mahmah ta ahihman ahi hi.
Khangno lam  i et ciangin, Ngeina zangnuam, laam nuam, lasa nuam mahmah napi u a makaih ding omlo hi. Khuado pawi, Zo-minam-ni, leh hun thupi kempeuh ah kizan nuam hi. Nitumna gamah, tua bang pattahna pen private Business danin CLUB tuamtuam hong uh hi. Laam sinna , lasak sinna, khuangtum sinna, daktum sinna, cih bang neih huai mahmah hi. Tua munah Culrural Staff vantuamtuam kizuak hi. Muciacal equipment namkim kizuak hi. Lutman tumman leh fees tuamtuam tawh business hoih mahmah suak hi. Kikaihkhopna thupite ah amaute makai-in entertaintment tavuan la uh hi. Actors, Actress ahi Kineihsiam numei-pasal pantah uh hi. Mipi bangmah theilote Pupa-Ngeinate a hunhunin lak uh hi. Taangvante kaikhawmin Ngeina kepna phualpi suaksak hi. Khangthak khantohnate i phak dongin delhin, khanglui ngeinate zong kepdan i siam ding hi. Ngeina sinna-mun CLUB neihhuai hi.
6. Artistic tawh nasepna:  Siamneel'-pilna, Artistic  thupi mahmah hi. Laigelh-siam, cartoon-siam, ciamnuih-siam, laphuak-siam, lasa-siam, laam-siam, kineih-siam, kizuun-siam, kisam hi. Political mipil misiam tampi panin doctrine leh policies hoih mahmah tampi a omzongin mipi sung huzaap ding haksa mahmah hi. Cartoon-siam, ciamnuih-siam, laphuak-siam, lasa-siamte in, mipi tel theih dingin, limtawh lakin, langaih tawh sa-in, ciamnuih tawh hong telkheh khiat ciangin mipi  lungsungah lutin huzaapzo pan ahi hi. Zomi a khangkhangin Ciamnuih-siam omtoto hi. Minambup zuunzo dingin, society kipawlna neih huai hi. Nuih zak huai beklo-in, ahoih leh ahoihlo, kilawm leh kilawmlo, uphuai leh uphuailo thu tampi musak hi. Gam itna khangsak, minam kipumkhatna khangsak ciamnuih kisam hi. Mihingte teisak, mitvak sak hi. Cartoon limsuai-siam te tung panin i telloh thu kitel baih hi. Laitampi sim kullo hi. Thu saupi ngaih kullo hi. Cartoon mipilte in enkhatin thuthuk tampi pholak thei hi.
Laphuak-siam leh Lasak-siam:  Lasiamte lasakna tungtawnin khitui luang dongin lungsim sukha thei hi. Thangpai-in hangtakin khensatna pia thei hi. Lasa siam leh laphuakte in mihing lungsim zobaihin deihdeihin kiheisak hi. Galhanna la kisa leh galkapte in galsim ding leh sih ding kihta lo hi. La in ki-itna khang sak hi. Meidawite hangsan sak hi. Kiphasakte lungsim neemsak hi. Naupangno panin khangham dongin la zawhloh mi omlo hi. Zomite khantohna leh kipumkhatna a manlan nadingin hihthu teng kisam masa kasa hi. Keipen teekta, cidamnalam zong hoihlualo kahihmanin kalung sungaa kavei thute hong gelh zel kahi hi.

Written by - Thang Siangh
Source by - Tongsan 

No comments:

Post a Comment