1. Pasian tungah tavuan:
Jesu innsung a Pa lu ahih ding ahi. Tulai in a dang te genlo in ei Kristian kici te innsung mah mah en le hang, Pasian in mun a tanlohna inn tampi om hi. Tua ci bang innsung te a, Pasian in vaihawm theilo ahihmanin, Innsung nuam, mite etton tak Innsung suak thei lo hi. Pa aw, Pasian na Innsung ah a sangpen in na koih hiam? Amah a sangpen mun pia in, Amah deih dan in ki uk sang lecin, van gam nai pen mun ah na inkuanpih te ompih pih himai na hi.
2.Zite tungah tavuan:
Pasal ten zite it ding ahi. Pasal te insung ah vaihawm ding leh makai ding in Pasian in tavuan(responsibility) a piak ahi hi. Pa khenkhat te insunga a mohpuak bang a a sep loh ciangin, innsung ah nawngkai na lian pi om hi.Tua kia hilo in, Bible sungah “Pasal te aw, na zite uh ana it un..” cih I mu hi. Insunga Pa ciat in Pasian tawh kizopna nei in, Pasian apat a itna tawh a zite uh a it ding uh ahi hi. Paunak ah, “Na khangno lai a, na zi tawh nuam sa in om un” ci hi. Ei Zomi te sungah zite pen nidangsangin kikoih sang zaw ta ahihmanin lungdamhuai hi. Ahihangin, Pasian in it ding a cih bangin I it zo na hiam, Pa te kingaihsun ni. Efesa laibu sungah “….. pasalte in zong amau’ pumpi zah mah baangin a zite uh a it ding uh ahi hi. A zi a it mi in amah a ki-it ahi hi.” A ci hi. Tua ahih manin Zi itlo te pen amah mah ki it lo cih na hipah hi.
family_0018
Creative Commons License photo credit: Laris.Sa*
Ziten kiniamkhiatna tawh Pasal te thu man ding ahi hi. Pasian in pasal te tungah a zite uh ukna ding tavuan a pia hi(Efesa 6:23). Tua ahihmanin, Zite in kiniamkhiatna tawh a Pasal te uh thu a man ding uh Pasian deihna ahi hi. Zi, Pasal te vaihawm ngak lo a, ama thu thu a gaamta te pen Pasian deih dan ahihloh banah, Insungah zong kilemna om thei lo hi. Tua ahihmanin, Insungnuam I bawltheihna ding in Ziten Pasian thu a man mah bang un Pasalte thumanna lungsim a neih uh kisam hi. Na Pasal bang ci bang a gina lo hita se leh, zite aw, Pasian thuman na in, na Pasal te uh thunuai ah kitah lut phot phot un, a sawtlo in a limci gah na lo ding hi.
3.Tate tungah tavuan:
Pa in tate Pasian deih na lampi ah a neu a pat a pattah ding a tavuan ahi hi. Paunak khat in tate omzia(Character) pen nu leh Pa ten insunga a ukzia uh a kimuhna(reflection) ahi a na ci hi. Insungah na tate na uk dan in mi lak ah zong va gamta ding uh hi. Taten Nu leh Pa thuman ding pen thukham, thuciamna tawh om masa pen ahi hi. Pasian thu sungah I tate I makaih na hiam? A mizia ding uh tavuan Pasian in Pa te khut ah koih ahi hi. Na bawl theih lai in, a poimawh leh sat ding lungka ken. Tungman bang a ut bang bang a mek thei ahihlai un, na deih dan tak in mek in bawl in. A khauh khit cianga bawl thak sawm in bangmah phatuam nawn lo ding hi. Pa aw, na ta in na khekhap ong zui zui ahihlam thei in la, na omdan enpha in.
Insung vangam nai pen a suah na ding in, Insungah Pasian in tavaun(responsibility) ong piak dan dan in hoih tak in sem khe leng, tua pen Pasian lungdam hi a, a gah in ong zui ding hi. Pasian in ong ciamsa ahi hi. Tu ni in ki enpha thak ni. Insung vangam nai pen a suah na ding in, Insungah Pasian in tavaun(responsibility) ong piak dan dan in hoih tak in sem khe leng, tua pen Pasian lungdam hi a, a gah in ong zui ding hi. Pasian in ong ciamsa ahi hi. Tu ni in ki enpha thak ni.
By Pa G Swan Za Lian, Chairman ZCF Delhi
Source by - Vphual.net
No comments:
Post a Comment