NLD THUSUNNA THUKHEN ZUM PAN KINIAL

Kawlgam a makaih NLD in Registration kician nei bek tham loin, 1990 kum Kawlgam bup kiteelna ah gualzawhna lianpi ngah uh hi. A hi zongin kumpi kivaipuak zia ding tawh kisai vaihawmnate thuman lo ahihna leh 2008 kum a galkap Kumpi in amau deih bangin Thukhun abawlte NLD Party in adeihlohnate hangin 2010 Election tungtang ah Registration a bawl theihlohna dingin March 29,2010 ni-in khensatna nei uh hi.
Tua banah galkap kumpite' makaihna tawh kibawl 2010 Election tungtang pan NLD party leh a dang party 10 te Party ading thei nawn lo( asi) dingin September 14,2010 ni-in Tangko khia leuleu uh hi. Hih thu tawh kisai NLD lungkimlo uh a,  party a dinsuak theihna ding abeisa January 24,2011 ni-in Nyipyidaw thukhenzumpi ah akhiatna uh pen January 28,2011 ni in guallelsak (nial) uh hi.

Tua bangin akinial hangin, lungkimlohna kila kik thei dingin NLD palai sem U Kyaw Ho in gen hi. Tua bek tham loin NLD thusunnate Nyipyidaw pan akinail sak zenzen hangin NLD in a maban semsem lai dingin gamvai kiva ( mature politician) ahi U Kyine Tun in gen hi. Nyipyidaw pan NLD thusunnate akinial hun laitak mahin NLD zumpi, Shwegondaing ah Second Panglong Conference vai ding thukikupna thupitak nei uh cih kiza hi.

Tua laiah Zomi makai Pu Chin Sian Thang (President-ZNC) leh Shan National League Democrecy pan Sai Saw Aung (Secretary of SNLD) te in 1st Panglong Conference thu leh Panglong Thukimna (Agreement) tawh kisai thu tuamtuam genkhiatna nei uh hi. Thukupna hun sungah NLD makaite, mualmi Party tuamtuam pan Khangno 100 val kihel cih kiza hi. Hih NLD te akinialna tawh kisai mai February 12,2011, Kawlgam bup Ni ( Union day) ciangin NLD zumpi mahah nasiatak kikupna nei kik ding cih kiza hi.
Source by-  Irrawaddy
Posted by - Tongsan Tanute