LEIBA LOH ZAWH LOH MANIN INNKUAN BUP GUZA NE

Pegu Division, Gyobingauk khuapi Zicho Taung veng ateeng U Ti Pwar (Kum 39), leh a zi Daw Kay Khine Win@ Mee Nge(Kum 37) te nupa in sum kitah nasep ahi;  English Primier League bawlung kidemna, Chee mal 2,3 leh Kawmte kam-etna (lottery ticket) te zuakna ah innpi semin a tawm pen Ks. 300 million kyat (US$337,078) leiibat neih lawh uh hi. A leiibat tam semsem ahih manin, a lohna ding lungkham lautna tawh February 22,2011 ni-in amau nupa le atanu Miss.Pon Pih Sone (Kum-3) tawh guza dawnin innkuan bupin si uh hi. 
A sihni zingsang tungin Leiiba ngente a inn ah pai-in letmat thuh sakna lai sungah, " Ka cihna ding uh thei zo nawn kei ung! Ka tanu neih sun uh zong mite' maiah maizum, genthei a nuntak ding sangin, ka innkuan un ka sikhin zaw mai ding uh hi " ci-in laigelh nusia cih a meltheihte in gen hi. U Ti Pwar pen mi mawkmawk hi loin, Gyobing Gauh Market sungah Kham (Goal) zuakna sumbukpi khat anei ahi hi.

Tua ni sun lamin a inn mai uh a teeng asungh nu in atuno Miss. Pon Pih Sone (Kum-3) anpia nuam in a vahawh phet ciangin, Miss Pon Pih Sone pen lupna tungah puanza, thopuan tawh kitun in om a, U Ti Pwar pen a kam sung pan a leii dawkkhia sa in si a, a tanu Daw Kay Khine Win pen a muuk dup gawp sa in, lupna nuai ah asisa vive in kimu ci hi.

A luang gei Sabuai tungah Nupate' letmat thuhna laidal le Guza kitunna laidalte kikoih in, Video CD kihong kawmin kinusia in a vengte in gen hi. A thu pian zia tawh kisai Township thuneute in pulakna ding haksa sa uh a, a tanu thahna hangin a nu le pa i luang/akhut tungah Sikkol bulh sak veve uh hi. Hih innkuante mi 3 kithatna hangin, khuami khempeuh linglawng uh a mangngilh theih loh ding thu khatin kigen ci hi.

A tanu uh pen Mocu kah a it huai mahmah laitak ahih manin, a mu kha peuhpeuh khitui luangin kikap ziah ziah ci hi. Hih khua ah abeisa July, 2010 sungin Sang Siamah khat zong Chee mal 2 hangin Leiiba loh zo nawn lo ahihna tawh Guza dawn mahin si ngei ci-in khuamite in gen hi. Hih sihna hangin Palikte leh Lokhawhna lam thuneite in Lungnoza kizuakna sumbuk khempeuh ah endikna bawlin, vanzuakna ah kidop mahmah dingin gen uh ci hi.

Hih khua sungah Chee mal 2,3 akipan sum kitaahna pen khauhpai lua mahmah ahih manin, mi 10-8 in sum kitah nasep sem ci hi. Tua nasepna tawh nuntak zonna in kizang ahih manin, Kumpi thuneite in a kham cih sangsik in, a mau mahmah tungah sumgolh kipia pia sak lai uh ci-in, khuamite in gen hi. Sum kitahna pen thuman lo nasep ahih hangin, Kumpi thuneite in zong limsep zaw lai-in, Kawlgambup kizel ta hi.  

Tua ahih manin, hih bang Chee mal 2,3 leh sum kitahna tuamtuam pan siatnate in Zomite' inn sungah hong nasiat ma in, Topa tha tawh do mengmeng ding kisam hi. A nungta Pasian a um Zomite in hih bang Pasian deihloh nasepnate tawh nuntak sawm loin, Pasian kihtakna le thumanna tawh nungta ciat dingin Pasian in hong ompih hen. 

Posted by - Tongsan Tanute